Whistleblower
Print
Oqaatiginnissinnaatitaanermut politikki


Nunatsinni Namminersorlutik Oqartussani oqajamaamik aaqqissuussineq pillugu malittarisassat

 

Kapitali 1.

Nassuiaat siunertaalu

 

§ 1. Nunatsinni Namminersorlutik Oqartussat tassaapput qitiusumik allattoqarfik suliffeqarfiillu taassuma ataaniittut.

  Imm. 2. Qitiusumik allaffeqarfittut suliffeqarfinnillu taassuma ataaniittunik taagorneqartut matumunnga atatillugu tassaapput oqartussat/suliffeqarfiit, ilanngussaq 1-imi taaneqartut.

  Imm. 3. Oqajamaamik aaqqissuussinikkut siunertaavoq Nunatsinni Namminersorlutik Oqartussat allaffissornikkut aqutsisoqarfianni taamatullu innuttaasunik sullissinermi assersuutigalugu annertuumik kukkusoqarsimanera pillugu paasissutissanik ingerlatitseqqittarnermut toqqissisimanartunik tunngaveqarnissap qulakkeerneqarnissaa.

  Imm. 4. Annertuumik pingaarutilinnilluunniit kukkunerit pillugit § 2 malillugu paasissutissiinerit taamatullu paasissutissiinerit taamaangajattut pisariaqartinneqartutut mianersuullugit suliarineqartassapput. Nunatsinni Namminersorlutik Oqartussani pitsanngorsaatinik pilersitsiniarnermi kukkunernillu pinaveersaartitsiniarnermi paasissutissat atorneqassapput.

  Imm. 5. Oqajamaamik aaqqissuussinikkut Nunatsinni Namminersorlutik Oqartussat allaffissornikkut aqutsisoqarfianni attaveqaqatigiittarfiit nalinginnaasut pilersinneqareersullu taarserneqanngillat. Oqajamaamik aaqqissuussineq taamaallaat assersuutigalugu tatigisaalluni sinniisoqarnermik aaqqissuussinermut imaluunniit suleqatigiinnissamut isumannaallisaanermullu sinniisoqarnermut tapertaassaaq.

 

Kapitali 2. 

Oqajamaamik aaqqissuussinerup atorneqarfissai

 

§ 2. Nunatsinni Namminersorlutik Oqartussat allaffissornikkut aqutsisoqarfianni sulisut tamarmik ajunngitsumik siunertaqarlutik oqajamaamik aaqqissuussinermut atorfeqartitaanerminnut ajoqutaasumik pissusilersortoqarnissaa ersissutiginagu paasissutissiisinnaatitaapput.

  Imm. 2. Paasissutissat imm. 3-mi taaneqartut kinaassuseq oqaatiginagu tunniunneqarsinnaapput.  Sulisup oqarasuaatikkut internetikkulluunniit oqajamaamut aaqqissuussineq pillugu isertarfianut saaffiginnissuteqarnerani,  sulisup kinaassutsini oqaatiginagu saaffiginnissinnaanini periarfissaralugu ilisimatinneqassaaq. Sulisup kinaassutsini oqaatigisimappagu, kinaassutsip oqaatigineqannginnissaa sulisup qulakkeersinnaanngilaa.

  Imm. 3. Paasissutissat makkua oqajamaamik aaqqissuussinermut ilaapput:

a)    Namminersorlutik Oqartussat sulianik suliarinninneranni, allaffissornikkut aqutsineranni innuttaasunillu sullissineranni kukkunerit annertuut sumiginnaanerillu,

b)    suliffeqarfimmi tunaartarisassanik kaajallaasitanillu unioqqutitsinerit annertuut,

c)    Namminersorlutik Oqartussat sulianik suliarinninneranni, allaffissornikkut aqutsineranni innuttaasunillu sullissineranni kukkusaqattaarnerit sumiginnaasaqattaarnerilluunniit annertuut,

d)    Namminersorlutik Oqartussat inatsisilerinikkut pisussaaffiinik annertuumik kukkusoqarsimaneranik pissusissamisuunngitsoqarneranik, inatsisinik unioqqutitsinernik annertuumillu soqutigisaqartoqartannginneranik tunngavissalimmik pasinartoqartillugu,

e)    paasissutissat avatangiisinut uumasunullu annertuumik ulorianaatillit, tassa paasissutissat Namminersorlutik Oqartussat suliassaminnik naammassinnittarnerannut pingaaruteqassappata,

f)      paasissutissat meeqqanik inersimasunilluunniit sumiginnaanermik kinguneqarsimappata kinguneqassappataluunniit, tassa paasissutissat Namminersorlutik Oqartussat suliassaminnik naammassinnittarnerannut pingaaruteqassappata,

g)    sulisut atorfinitsitaanerminni inatsisitigut pitsaanngitsumik qisuariarfigineqarnermik misigisaqarsimappata, oqajamaamik aaqqissuussineq tunngavigalugu paasissutissanik tunniussisimanertik pissutigalugu.

  

Kapitali 3. 

 

Naalakkersuisut Kukkunersiuisoqarfiata suliassai, piginnaatitaaffii aaqqissuussaanermilu inissisimanera

 

§ 3. Naalakkersuisut Kukkunersiuisoqarfiata "Namminersornerullutik Oqartussani Kukkunersiuisoqarnermut Tunngaviusumik Ilitsersuutaanni" 7. juni 1990-imeersumi suliassat taaneqartut saniatigut oqajamaamik aaqqissuussinerup allaffissornikkut aqunneqarnerata suliarineqartarnissaa akisussaaffigaat.

  Imm. 2. Naalakkersuisut Kukkunersiuisoqarfiata oqajamaamik aaqqissuussinermut tunngatillugu § 2 naapertorlugu paasissutissanik tunniunneqartunik tigooraaneq, suliarinnittarneq taamatullu paasissutissanik tunniunneqarsimasunik ingerlatitseqqittarneq suliassarai.

  Imm. 3. Naalakkersuisut Kukkunersiuisoqarfiat aaqqissuussaanikkut Aningaasaqarnermut Sulisoqarnermullu Aqutsisoqarfimmi inissisimavoq. Naalakkersuisut Kukkunersiuisoqarfiat Nunatsinni Namminersorlutik Oqartussani avataaniit sulisutut atuuffeqarpoq immikkoortortaqarfiullu pissutsit Namminersorlutik Oqartussani isornartorsiorneqarsinnaasutut takuneqarsinnaasut misissortarpai kukkunersiortarlugillu. Tamakkua saniatigut oqajamaamik aaqqissuussinermi allaffissornermut atatillugu Aningaasaqarnermut Sulisoqarnermullu Aqutsisoqarfiup inatsisilerinikkut piginnaasat pisariaqartinneqartut atugassiissutiginissaat qulakkiissavai.

    Imm. 4. Naalakkersuisut Kukkunersiuisoqarfiat allaffiup pisortaanit aqunneqarpoq. Naalakkersuisut Kukkunersiuisoqarfianni allaffiup pisortaa Aningaasaqarnermut Sulisoqarnermullu Aqutsisoqarfimmi aqutsisoqarfiup pisortaanut toqqaannartumik attaveqarpoq. Aningaasaqarnermut Sulisoqarnermullu Aqutsisoqarfimmi aqutsisoqarfiup pisortaa Naalakkersuisut Kukkunersiuisoqarfianni allaffiup pisortaanut naalakkiisinnaatitaavoq, suliallu suliarineqartussat tamaasa § 5, imm. 1 naapertorlugu akuerisussaallugit.

  Imm. 5. Naalakkersuisut Kukkunersiuisoqarfianni taamatullu Aningaasaqarnermut Sulisoqarnermullu Aqutsisoqarfimmi aqutsisoqarfiup pisortaanut sulisut pillugit oqajamaamik aaqqissuussinermut paasissutissat tunniunneqartut tamarmik tiguneranniit piaarnerpaamik Aningaasaqarnermut Naalakkersuisoqarfimmi naalakkersuisoqarfiup pisortaanut ilisimatitsissutigalugit nassiunneqartassapput. Tamatuma kingorna Aningaasaqarnermut Naalakkersuisoqarfimmi naalakkersuisoqarfiup pisortaata paasissutissat tiguneqartut qanoq suliarineqassanersut aalajangissavaa.

  Imm. 6. Naalakkersuisut Kukkunersiuisui Nunatsinni Namminersorlutik Oqartussani oqartussaasunut suliffeqarfinnulluunniit ilitsersuinissamik pisinnaatitaanngillat. Naalakkersuisut Kukkunersiuisoqarfiat oqajamaamik aaqqissuussinermik ingerlatsinermini, tamatumunnga ilanngullugu oqaaseqaatinik, aalajangiinernik assigisaanillu qulliunerusunut ingerlatiteqqinnissaminut pisussaaffiligaanngilaq.

  Imm. 7. Aningaasaqarnermut Sulisoqarnermullu Aqutsisoqarfimmi aqutsisoqarfiup pisortaa taamatullu Naalakkersuisut Kukkunersiuisoqarfianni sulisut paasissutissat oqajamaamik aaqqissuussinermik suliaqarnermik ilaattut ilisimalikkatik eqqarsaatigalugit nipangiussisussaatitaapput.

 

Kapitali 4.

Paasissutissat oqajamaamik aaqqissuussinermut tunniunneqartut suliarineqartarnerat

 

§ Imm. 4. Sulisoq § 2 naapertorlugu paasissutissiisoq Naalakkersuisut Kukkunersiuisoqarfiata paasissutissanik suliarinnittarnerata ingerlariaasia pillugu ilisimatinneqartassaaq. Sulisoq nammineq kissaateqarnermigut suliap suliarineqarnera inerneralu pillugit ilisimatinneqarnissaminut periarfissaqarpoq. Ilisimatitsineq sulisup kinaassutsiminik isertuusserusunneranit imaluunniit nipangiusimannittussaatitaaneq pillugu il. il. malittarisassanit killilerneqarsinnaavoq.

  Imm. 2. Paasissutissat tamarmik oqajamaamik aaqqissuussineq naapertorlugu tunniunneqartut Naalakkersuisut Kukkunersiuisoqarfiannit nalilersorneqartassapput. Paasissutissat pissutsinut sunut tunnganeri, pissutsit qanoq sakkortutigineri, kiisalu paasissutissiissutigineqartut tunngavigalugit pissutsit uppernarsarneqarnissaannut periarfissat naliliinermi ilaatinneqassapput.

  Imm. 3. Sulisut paasissutissiisimasut pillugit allagaatinik takunninnissamut qinnuiginninnermi Naalakkersuisut Kukkunersiuisoqarfiata naalakkersuisoqarfimmi pisortaq misissuinermik ingerlatsisuusoq § 5 imm. 3 aamma 4 naapertorlugit ilisimatissavaa. Ilisimatitsineq pissaaq sulisup paasissutissiisup kinaassutsiminik isertuussinissani toqqarsimappagu toqqarsimanngikkaluarpaguluunniit.

  Imm. 4. Paasissutissat pingaarutillit tamarmik allakkatigoortuunngitsullu Naalakkersuisut Kukkunersiuisoqarfiata oqajamaamik aaqqissuussinikkut ilisimalikkani pillugit Naalakkersuisut Kukkunersiuisoqarfiat allakkialiortassaaq.

  Imm. 5. Paasissutissat pissutsinut § 2-mi taaneqartunut tunngassuteqanngitsut imaluunniit pingaaruteqanngitsut Naalakkersuisut Kukkunersiuisoqarfiannit itigartinneqassapput.

  Imm. 6. Naalakkersuisut Kukkunersiuisoqarfiata paasissutissat sulisup tunniussimasai suliariumanngippagit sulisoq ilisimatinneqassaaq. Suliaq ilisimatitsissuteqarani unitsinneqassaaq, sulisup kinaassutsiminik isertuussinissani kissaatigisimappagu.

  Imm. 7. Naalakkersuisut Kukkunersiuisuisa paasissutissat suliarinissaat itigartikkuniuk, Nunatsinni Namminersorlutik Oqartussani attaveqaqatigiinnissamut aqqutit allat pillugit sulisoq sapinngisaq tamakkerlugu siunnersussavaa. Ilitsersuisussaatitaaneq atuutissanngilaq sulisup kinaassutsiminik isertuussisoqarnissaa kissaatigisimappagu.

 

Kapitali 5.

Suliffeqarfimmi namminermi misissuinerit

§ 5. § 2 naapertorlugu Naalakkersuisut Kukkunersiuisuisa paasissutissat tunniunneqarsimasut naalakkersuisoqarfimmut akisussaasumut ingerlateqqissavaat, paasissutissat pissutsinut sakkortuutut aamma/imaluunniit pingaaruteqartutut uppernarsarneqarsinnaanerannullu periarfissaqartutut nalilerneqarpata.

  Imm. 2. Naalakkersuisut Kukkunersiuisoqarfiat paasissutissanik ingerlatitseqqinnissaminut pisussaavoq, naalakkersuisoqarfimmi sulisoq atorfeqartitaanikkut inatsiseqartitsinermi nuanniitsumik sakkortuumik § 2 imm. 3, g naapertorlugu pineqarsimasoq paasissutissiissutigineqarpat.

  Imm. 3. Naalakkersuisut Kukkunersiuisoqarfiat imm. 1 aamma 2 naapertorlugit paasissutissanik ingerlatitseqqippat taava naalakkersuisoqarfimmi akisussaasumi Naalakkersuisoqarfiup pisortaa misissuinerup aallartinnissaanut, ingerlannissaanut naammassinissaanullu akisussaassaaq.

  Imm. 4. Naalakkersuisut Kukkunersiuisoqarfiat imm. 1 aamma 2 naapertorlugit naalakkersuisoqarfimmi pisortaq pillugu paasissutissanik tigusaqaruni, taava paasissutissat Naalakkersuisut Siulittaasoqarfiata Naalakkersuisoqarfiani pisortamut imaluunniit Aningaasaqarnermut Naalakkersuisoqarfimmi naalakkersuisoqarfiup pisortaanut ingerlatinneqassapput. Naalakkersuisoqarfiup pisortaa paasissutissanik tigusisoq, misissuinermik aallartitsinissamut, ingerlatsinissamut naammassinninnissamullu akisussaassaaq.

  Imm. 5. Naalakkersuisoqarfiup pisortaata misissuineq naammassiniariarpagu Naalakkersuisut Kukkunersiuisoqarfiat pissutsit misissuiffigineqartut pillugit nassuiaammik allaganngorlugu tunineqassaaq.

 

Kapitali 6.

Iliuuseqarnissamut periarfissat ilisimatitsissuteqartarnerlu

 

§ 6. Naalakkersuisut Kukkunersiuisuisa § 5, imm. 5 naapertorlugu nalunaarusiaq tiguguniuk, Naalakkersuisut Kukkunersiuisui suliaq pillugu allakkatigut oqaaseqaateqassapput.  Naalakkersuisut Kukkunersiuisoqarfiat tassunga atatillugu kaammattuuteqarsinnaavoq.

§ 7. Naalakkersuisut Kukkunersiuisoqarfiata allaganngorlugu oqaaseqaasiani naalakkersuisoqarfiup pisortaanut misissuinermik aallartitsisumut, ingerlatsisumut naammassinnittumullu § 5 imm. 3 aamma 4 naapertorlugit nassiutissavaa.

  Imm. 2. Naalakkersuisoqarfiup pisortaa misissuinermik naammassinnissimasoq, Naalakkersuisut Kukkunersiuisoqarfiat allakkatigut nalunaarfigissavaa, naalakkersuisoqarfiup pisortaata Naalakkersuisut Kukkunersiuisoqarfiata inassuteqarnera malinnianngikkuniuk.

  Imm. 3. Naalakkersuisut Kukkunersiuisoqarfiata paasissutissanik ingerlatitseqqittarneq pillugu inatsisini atuutsinneqartuni toqqartumillu nalilersuereernermi kingorna Naalakkersuisut Siulittaasuata Naalakkersuisoqarfiani pisortamut imaluunniit Aningaasaqarnermut Naalakkersuisoqarfimmi naalakkersuisoqarfiup pisortaanut oqaaseqaatini ingerlatissinnaavaa.

 

Kapitali 7.

Atuutilersitsineq

 

  § 8. Oqajamaamik aaqqissuussineq atuutilerpoq 1. maaji 2015

 

 

 Lars Dencker

Aqutsisoqarfiup pisortaa

Aningaasaqarnermut Sulisoqarnermullu Aqutsisoqarfik




Bilag 1. 

  • Naalakkersuisut Siulittaasuata Naalakkersuisoqarfia / Formandens Departement 
  • Peqqissutsimut Naalakkersuisoqarfik / Departementet for Sundhed
  • Aningaasaqarnermut Naalakkersuisoqarfik / Finansdepartementet
  • Aatsitassanut Ikummatissanullu Naalakkersuisoqarfik / Råstofdepartementet
  • Inuussutissarsiornermut, Suliffeqarnermut Niuernermullu Naalakkersuisoqarfik / Departementet for Erhverv, Arbejdsmarked og Handel
  • Nunanut Allanut Pisortaqarfik / Udenrigsdirektoratet
  • Aalisarnermut, Piniarnermut Nunalerinermullu Naalakkersuisoqarfik / Departementet for Fiskeri, Fangst og Landbrug
  • Ilaqutariinnermut Naligiissitaanermut Isumaginninnermullu Naalakkersuisoqarfik / Departementet for Familie, Ligestilling og Sociale Anliggender
  • Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik / Departementet for Uddannelse, Kultur, Forskning og Kirke
  • Pinngortitamut, Avatangiisinut Inatsisinillu Atuutsitsinermut Naalakkersuisoqarfik / Departementet for Natur, Miljø og Justitsområdet
  • Ineqarnermut, Sanaartornermut Attaveqarnermullu Naalakkersuisoqarfik / Departementet for Bolig, Byggeri og Infrastruktur
  • Sanaartornermik Ilinniarfik / Bygge- og Anlægsskolen
  • Saviminilerinermik Ilinniarfik / Jern- og Metalskolen
  • Peqqissutsimut Pitsaaliuinermullu Aqutsisoqarfik / Styrelsen for Sundhed og Forebyggelse
  • Digitalinngortitsinermut aqutsisoqarfik / Digitaliseringsstyrelsen
  • Aningaasaqarnermut Sulisoqarnermullu Aqutsisoqarfik / Økonomi- og Personalestyrelsen 
  • Akileraartarnermut Aqutsisoqarfik / Skattestyrelsen
  • Atuisartoqarnermut Unammilleqatigiinnermullu Aqutsisoqarfik / Forbruger- og Konkurrence Styrelsen
  • Aalisarsinnaanermut Akuersissutinik Nakkutilliisoqarfik / Grønlands fiskerilicenskontrol
  • Aatsitassanik Suliassaqarfinnut Avatangiisinut Aqutsisoqarfik / Miljøstyrelsen for Råstofområdet
  • Aatsitassanut Ikummatissanullu Aqutsisoqarfik / Råstofstyrelsen
  • Nunatsinni Naatsorsueqqissaartarfik / Grønlands Statistik
  • Sungiusarfik ”Aaqa”
  • Børnehjemmet Uummannaq
  • Ado Lyngep Atuarfia
  • Qasapermiut
  • GU-Nuuk
  • Nuna tamakkerlugu ilitsersuisarfik / Nationalt Vejledningscenter
  • Oqaasileriffik / Sprogsekretariat
  • Nunatta Atuagaateqarfik / Landsbiblioteket
  • Nunatta Katersugaasivia Allagaateqarfialu / Nationalarkivet
  • Gertrud Rask Minde
  • Perorsaanermik Ilinniarfik / Socialpædagogisk Seminarium
  • Niuernermik Ilinniarfik Nuuk / Handelsskolen i Nuuk
  • Najugaqarfik Elisibannguaq
  • Palleq
  • Angerlarsimaffik Isikkivik
  • Ilinniartut Ineqarfiisa Allaffeqarfiat / Uddannelses – og kollegieforvaltning 
  • Oqaatsinik Pikkorissafik / Sprogcentret  
  • INUILI / Levnedsmiddelskolen
  • Imarsiornermik Ilinniarfik / Grønlands Maritime Skole
  • Røde Korsip børnehjemmia / Røde Kors Børnehjem
  • Ivaaraq
  • Prinsesse Magrethes Børnehjem
  • Nunalerinermik Atuarfik / Landbrugsskolen
  • Meeqqat Inuusuttullu Oqaloqatigiinnittarfiat / Børnerettighedsinstitutionen 
  • Kalaallisuuliornermik Ilinniarfik
  • Ilaqutariittut ikorfartorfik/ Familieinstitution
  • Ikorfartorfik / Sikret afdeling
  • Campus Kujalleq
  • Peqqissaanermik Ilinniarfik / Center for Sundhedsuddannelser
  • GU-Aasiaat
  • Nunatsinni Nakorsaaneqarfik / Landslægeembedet
  • Angerlarsimaffik Uulineq
  • Sarliaq
  • Sungiusarfik Ikinngut
  • Eqqumiitsuliornermik Ilinniarfik / Kunstskolen
  • Meeqqat Illuat
  • Pinngortitaleriffik/ Naturinstituttet
  • Ilisimatusarfik / Universitetet
  • Inuusuttut Inaat
  • Angerlarsimaffik Aja 
  • Asiaq /Grønlands Forundersøgelser
  • Nukissiorfiit
  • Mittarfeqarfiit / Grønlands Lufthavne