Whistleblower
Print
FAQ


Whistleblowereqarnermik aaqqissuussinermik sooq pilersitsivugut?
Namminersorlutik Oqartussat suliffeqarfiupput Namminersorlutik Oqartussani sulisut tamarmik eqqunngitsunik inatsisinilluunniit unioqqutitsinernik paasisaqarunik killilersorneqanngitsumik oqaaseqarfigisinnaasaat.

Suliffeqarfimmi eqqunngitsuliornernik imaluunniit peqquserlunnernik sulisut siullullutik paasinnikkajuttarput. Akuttunngitsumilli takusarparput amerlanerit taamaaliornermikkut suleqatiminnut sulisitsisuminnulluunniit kusanaatsuliortutut misigisimanissartik pissutigalugu pasitsaassaminnik ingerlatitseqqinnissaminnut tunuarsimaarsinnaasartut.
 
Namminersorlutik Oqartussat isumaqarput paasissutissat taamaattut saqqummertarnissaat pingaartorujussuusoq, taamatullu pisoqartarnissaanut suliffeqarfimmi kulturi ammasoq naammattuaannanngimmat Whistleblowereqarnermik aaqqissuussinermik pilersitsivugut.

 

Kikkut nalunaaruteqarsinnaappat?
Namminersorlutik Oqartussat qitiusumik allaffeqarfianni, immikkoortortaqarfinni, Nukissiorfinni, Mittarfeqarfinni Asiamiluunniit sulisut nalunaaruteqarsinnaapput.
Pissutsit suut nalunaarutigineqarsinnaappat?
Whistleblowereqarnermik aaqqissuussineq taamaallaat isornartunik pingaaruteqartunik nalunaaruteqarnermut atorneqarsinnaavoq.Pissutsit pingaaruteqartut pillugit Whistleblowereqarnermik aaqqissuussineq aqqutigalugu nalunaarutigineqarsinnaanermi paasissutissat makkuusinnaapput:
  • aningaasatigut pinerlussimanerit, soorlu aningaasanik paarisanik peqquserluuteqarneq, akilerneqarluni akuersineq, peqquserlunneq aamma peqquserlulluni allagaasiorneq,
  • sullivimmi isumannaallisaanermik unioqqutitsinerit annertuut,
  • avatangiisit pillugit malittarisassanik unioqqutitsinerit annertuut
Qulaani allassimasut assersuutaannaapput. Takunnissimanerit nalunaarutigissanerlugu nalunaarutigissannginnerluguluunniit nalorniguit nalunaaruteqarnissannik kaammattussavatsigit. Saaffiginnissutit tamarmik suliarineqartarput. Nalunaarutit nalunaaruteqarsinnaatitaanermut ilaanngippat –postbokseqaruit imaluunniit kinaanerit isertuukkukku – saaffiginnissaguit ilinnut nalunaarutigineqassaaq.
Qanoq nalunaaruteqartoqartarpa?
https://oqarit.nanoq.gl aqqutigalugu nalunaartoqartassaaq. Allatigut nalunaaruteqartoqarsinnaanngilaq, assersuutigalugu inummut nalunaarfigineqarsinnaatitaasumut e-mailimik nassitsinikkut, tassa inuit pillugit paasissutissat isertuussat internetikkut toqqaannaq atuarneqarsinnaasunngorlugit nassiunneqartut pineqarmata.

Nalunaartoqarpat postboksimillu pilersitsinissaq toqqarneqarpat allattuivimmut kingusinnerusukkut isernissamut periarfissaqarpoq takullugulu suliassanik suliarinnittartoq suliaq pillugu annertunerusunik apeqquteqarsimanersoq imaluunniit annertunerusunik uppernarsaateqarnissaq ujartorneraa. Tamatuma kingorna oqaloqatigiittoqarsimappat tamanna isertuulluinnarneqassaaq, apeqqutaaginnarlunilu nalunaaruteqartup allattuivimmut iserusunnersoq suliassanillu suliarinnittartup apeqqutai akillugit. 
Nalunaarutit kikkunnit suliarineqartarpat?
Nalunaarutit Namminersorlutik Oqartussat Namminneq Kukkunersiuisoqarfianit suliarineqartarput.  Nalunaarutinni inuk Namminersorlutik Oqartussat Namminneq Kukkunersiuisoqarfianni sulisoq pineqarpat, nalunaarut Aningaasaqarnermut Sulisoqarnermullu Aqutsiveqarfimmi pisortamit suliarineqassaaq.
Paasissutissat nalunaarutigineqartut naqqinneqarsinnaappat?

Aap.  Nalunaaruteqarsinnaanermut nittartagaq aqqutigalugu nalunaaruteqarsimaguit, malugalugulu tamakkiisuunngitsunik eqqunngitsunilluunniit nalunaaruteqarsimallutit, taava qarasaasiamut isissut suliallu normua atorlugu isiinnassaatit sunalu naqqinneqassanersoq allaaseralugu.
 
Isissut aamma/imaluunniit suliap normua puigorukku Nalunaartussaatitaanermut nittartagaq atorlugu nutaamik nalunaaruteqarnissamut periarfissaqarputit, tassani siusinnerusukkut nalunaaruteqarsimanerit innersuussutigalugu sunalu naqqinneqassanersoq allaaseralugu.

Suliaq malinnaaffigineqartillugu suliami paasissutissat pissarsiarineqarsinnaappat?
Naamik. Suliaq Nalunaaruteqarsinnaanermut nittartakkami malinnaaffigigaluarlugu suliami paasissutissanik pissarsisinnaanngilatit. Kisiannili isissut suliallu normua atorlugu nittartakkamut isersinnaavutit, arlaatigullu apeqquteqarsimanerput imaluunniit paasissutissanik annertunerusunik assigisaannillu pissarsiniarsimanersugut malinnaavigalugu. Nipangiussisimasussaatitaaneq il.il. pillugit malittarisassat ataqqillugit apeqqutigisinnaasatit aamma akissavavut.